Алматыда екі айға қамауға алынған Qaznews24 сатиралық паблигінің авторы Темірлан Еңсебекке қатысты қалалық полиция департаментінде 24 қаңтарда тергеу амалдары жүргізілді деп хабарлады оның адвокаты Жанар Балғабаева. Заңгердің айтуынша, Еңсебектің заттарын түгендеу кезінде оның телефоны мен компьютерін бұған дейін ашуға әрекет жасалғаны байқалған.

"Полиция департаментінде заттарды түгендеп қарау кезінде Темірланның макбугы мен телефонын бұған дейін ашып, пайдалануға шектеу қойып тастағанын көрдік", – деп хабарлады Балғабаева 27 қаңтарда Алматыда қазақстандық адам құқықтары жөніндегі бюрода өткен баспасөз мәслихатында.

Адвокат заңда гаджеттер және өзге де барлық мүлікті иесінің көзінше қарап, тексеру туралы атап жазылғанын еске салды.

Бұдан бөлек, оның айтуынша, Еңсебектің камерасында тінту жүргізілген.

"Тергеу амалдарына дейін Темірланмен жеке әңгімелеске кезде ол осы күннің қарсаңында камерасында тінту жүргізілгенін айтты. Телефон іздепті, Qaznews24 неге әлі істеп тұр, оған кім жариялап жатыр деп сұрапты", – деді адвокат.

QazNews24 сатиралық паблигінің авторы Темірлан Еңсебекті полиция 17 қаңтарда үйіне тінту жүргізгеннен кейін ұстап әкеткен. 18 қаңтарда Еңсебек екі айға қамауға алынды. Оған "ұлтаралық алауыздық қоздырды" деген айып тағып отыр. Еңсебек күдікті деп танылған баптың санкциясында айыппұл, бостандығын шектеу немесе екі жылдан жеті жылға дейінгі мерзімге бас еркіндігінен айыру жазасы қарастырылған. Еңсебектің адвокаты Жанар Балғабаеваның айтуынша, оның қорғауындағы сатиралық паблик авторына қарсы іс қозғап, тергеу бастауға әлеуметтік желіні бақылайтын полиция қызметкерінің рапорты негіз болған.

Темірлан Еңсебекке "Йоу, орыстар" атты әнге бола "алауыздық тудырды" деген айып тағылып отыр. Сатиралық паблик мазмұнында дөрекі сөздер бар даулы әнді осыдан бір жыл бұрын, ресейлік тележүргізуші Тина Канделакидің Қазақстанда орыс тілі кемсіту көріп отырғаны жайлы мәлімдемесіне реакция ретінде жариялаған еді (Қазақстан сыртқы істер министрлігі Канделакиді сол мәлімдемесігнен кейін нон-грата тұлғалары тізіміне қосқан). Қазақстанда ол әнге тыйым салынбаған: әртүрлі аккаунтарда әлі тұр.

Еңсебек тұтқынға алынғаннан кейін Қазақстанның бірнеше қаласында белсенді азаматтар мен журналистер Еңсебекке қолдау білдіріп, көшеге шығып жалғыз адам пикетін өткізді. "Сатира қылмыс емес" деген ұранмен Алматыда журналистер Руслан Бикетов пен Әсем Жәпішева, белсенділер Ақмарал Жәкібаева мен Ақторғын Ақкенжебаласы, Қостанайда Сергей Зинченко, Ақтөбеда Мұсағали Дауылов. Астанада Марат Мұсабаев акциялар өткізді.

Алматы полициясы Еңсебек сатираға бола емес, "араздық қоздырғаны" үшін қылмыстық іс бойынша жауапқа тартылып жатыр деп айтты.

Журналистер қауымы мен сарапшылар биліктің Темірлан Еңсебекті қудалауын сынға алды.

ОҚИ ОТЫРЫҢЫЗ

IPHR Астананы сатиралық паблик авторы Темірлан Еңсебекті босатуға үндеді

Ақтөбе қаласының №3 соты 1986 жылы Желтоқсан оқиғасына қатысқан 64 жастағы тұрғынды 40 жылдан кейін саяси қуғын-сүргін құрбаны деп таныды. Бұл жөнінде Жоғарғы сот хабарлады.

Соттың айтуынша, Ақтөбе тұрғыны 1985 жылы Қазақ мемлекеттік университетінің философия және экономика факультетіне түскен. Алайда 1986 жылы 18 желтоқсанда оны “Желтоқсан оқиғасына қатысты” деген күдікпен құқық қорғау органдары ұстаған. Оны ізінше босатқанмен сол үшін оқудан шығарып, өзі мен әйелін қудалаған.

Соның салдарынан отбасы моральдық және материалдық қиындықтарға тап болған.

Биыл ол “1986 жылғы Алматыдағы Желтоқсан оқиғасына қатысуына байланысты саяси қуғын-сүргін фактісін тану туралы” сотқа арызданған.

“Ақтөбе қалалық N3 соты істі зерттей келе, арызданушының шынымен де 1986 жылғы Желтоқсан оқиғасына қатысқанын және саяси қудалауға, оның ішінде еңбек құқықтарын шектеуге ұшырағанын анықтаған. Бұл мән-жайлар университет пен Алматы қалалық прокуратурасының архивтік анықтамаларымен, сондай-ақ куәлердің айғақтарымен расталған. Азаматтық процестік кодексінің 306-бабын және «Жаппай саяси қуғын-сүргін құрбандарын ақтау туралы» Заңның 2-бабын басшылыққа ала отырып, сот талап қоюшыны 1986 жылғы оқиғаға байланысты саяси қуғын-сүргін құрбаны деп таныды” деп жазылған сот хабарламасында.

1986 жылы 17-18 желтоқсанда Мәскеудің Қазақстан басшылығына республикаға беймәлім, бұрын Ресейдің бір облысын басқарған партия шенеунігін тағайындау туралы шешіміне қарсылық білдіріп Алматының орталық алаңына шыққан қазақ жастарының шеруін совет билігі қатыгездікпен басып-жаншыды. Алматыдағы жастар наразылығы Кремльдегі орталық биліктің өктемдігіне қарсы СССР-дегі көлемді наразылықтың біріне айналды. Осы оқиғадан бес жыл өткенде Совет одағы тарады. Коммунистік партия "қазақ ұлтшылдығы" деп баға берген жастар шеруіне қатысушылар кейін ақталып, Желтоқсан оқиғасы қазақ жастарының азаттық жолындағы күресі ретінде тарихқа енді.

19 маусымда Маңғыстау облысы Қарақия ауданы шекарадағы “Болашақ” темір жол станциясы маңынан белгісіз ұшқыш аппарат табылды деп жаздыLada басылымы. Полиция ешкімнің зардап шекпегенін айтқан.

“Қандай да бір зиян келген жоқ. Оқиғаның жай-жапсары анықталып жатыр” деді полиция өкілдері басылымға.

Маңғыстау облысынан дрон алғаш рет табылып отыр. Бұған дейін Батыс Қазақстан облысындағы бірнеше елді мекендерге дрон құлаған еді.

18 ақпанда Бөкей ордасы ауданы Ұялы ауылының маңына ұшатын аппарат құлаған.

18 наурызда тағы бір дрон Тасқала ауданы аумағына құлағанын Атамекен ауылының тұрғындары хабарлаған. Заттың ұзындығы – 300 см.

24 наурызда Жанібек ауданы аумағынан дрон бөлшектеріне ұқсас заттар табылған. Екі күннен кейін Жәнібек ауданынан тағы дронға ұқсас аппарат табылды.

BES.media басылымы Ұялыда табылған дронның пішіні Ресейдің "Орлан-10" дронына ұқсас деп жазды. "Рособоронэкспорт" сайтының мәліметінше, мұндай дрон жер мен су бетін қашықтан бақылауға, GSM базалық станциялары мен ұялы байланыс желілерін анықтауға арналған.

Батыс Қазақстан облысы аумағынан 18 ақпан мен 18 наурызда табылған дронға ұқсайтын екі заттың фотолары әлеуметтік желіде жарияланған.

Маусым айының басында қорғаныс министрлігі БҚО-ға құлаған дрондар Ресейге тиесілі екенін, оларды жалға алынған полигонда сынақ кезінде ұшырғанын мәлімдеген.

Қазақстанның Ресеймен шекаралас аудандарында бұрын әскери зымыран қалдықтары бірнеше рет табылған. Ресейдің Астрахан облысында Капустин Яр әскери полигоны орналасқан. 2018 жылы жазда Батыс Қазақстан өңіріне құлаған зат сол полигоннан ұшырылған зымыранның бөлшегі екені анықталған.

19 маусымда Павлодар облысында ұйытқыған қатты желден зардап шеккендер 16 адамға жетті, бір әйел қаза болды. Бұл жөнінде жергілікті төтенше жағдай басқармасы хабарлады.

Ақсуда көліктің алдында жағында отырған 57 жастағы әйел адамға ағаш құлап, кеудесін тіліп өткен. Әйел адам сол жерде жан тапсырған. ТЖД мәліметінше, зардап шеккендердің үшеуі – бала.

Облыста ондаған ғимарат бүлінген. Бірнеше елді мекенде жарық өшіп қалған. Қазір жарық пен байланысты қалпына келтіру жұмыстары жүріп жатқаны хабарланды.

Ақпаратқа қарағанда, желдің жылдамдығы 43м/с жеткен. Облыста қатты желден кейін қалыпқа келтіру жұмыстарына 300-ден астам адам, 103 техника жұмылдырылған.

Вашингтон Ирандағы жағдайға араласу мәселесі бойынша шешімді алдағы екі аптада қабылдайды. АҚШ президенті Дональд Трамптың мәлімдемесі 19 маусымда Ақ үйдегі брифинг кезінде оқылды. Одан Fox News тікелей эфирде хабар таратты.

Трамптың сөзінше, "келіссөз жүргізу мүмкіндігі болғандықтан" осындай мерзім таңдалған. Ақ үйдің баспасөз хатшысы Кэролайн Левитт "келіссөзге кім араағайын болуы мүмкін?" деген сұраққа жауап бермеді.

"Президент Трамп Ирандағы биліктің ауысқанына мүдделі ме?" деген сұраққа Левитт Трамп Иранда ядролық қару болмағанына мүдделі деп жауап берді.

"Трамп Иранмен тіке қақтығыстан қашып отыр ма?" деген кезде президент "дипломатиялық шешімге сүйенеді, бірақ күш қолдануда қорықпайды" деді.

Левиттің сөзінше, Иранның ядролық қару жасауға барлық мүмкіндігі бар. Енді бұл мәселе саяси шешім болып қалды деді ол. Егер Иранның рухани көсемі Әли Хаменеи мақұлдаса, Тегеран "бірнеше аптада" атомдық қару жасап шығара алады. Трамптың пікірінше, мұны қалған елдер, оның ішінде Ресей де қаламайды.

Украина ұлттық полициясы оппозициялық блогер, "Бәсе" YouTube-арнасының авторы Айдос Садықовтың қазасына күдіктілер Украинадан шығып кетіп, оларға іздеу жарияланғандықтан сотқа дейінгі тергеуді тоқтатқан. Бұл туралы Азаттыққа Украина бас прокуратурасы хабарлады.

Украина тарабының мәліметінше, істе Қазақстанның К және Ж есімді азаматтары күдікті. Прокуратура тергеу кезінде күдіктілердің Украинаға қалай келіп кеткені, қылмысты қалай жасағаны анықталды.

"Күдіктілердің кінәсі дәлелдермен, яғни, камераларға, регистраторларға түскен видеоматериалдармен, күдіктілердің сөзімен, сот сараптамасымен, биологиялық материалдармен толық дәлелденді" дейді Украина бас прокуратурасы.

2024 жылғы 18 маусымда бір миллионнан астам жазылушысы бар оппозициялық "Бәсе" YouTube-арнасының авторы Айдос Садықовты Киевтегі үйінің маңында атып кеткен. Басына оқ тиіп, ауыр жараланған белсенді 2 шілдеде ауруханада көз жұмды.

Сол кезде Украина бас прокуратурасы Садықовтың қазасына қазақстандық Алтай Жақанбаев пен Мейрам Қаратаевты күдікті ретінде атаған. Кейін Қазақстан билігі Жақанбаев елге оралып, өз еркімен берілді деп хабарлаған.

Украиналық адвокат Дмитрий Моргун мамыр айында "Бәсе" арнасына берген сұхбатында Украина жағы Қазақстанға бір жыл ішінде үш рет сұрау салғанын, Қазақстанның құзырлы органдары тиісті дәрежеде қимылдамай отырғанын айтқан. Үш сұраудың негізгісі былтыр желтоқсанда берілген.

Биыл көктемде Садықовтың жесірі Наталья Садықова "Республика" басылымына Украина органдарының мәліметіне сүйеніп, Қазақстан Алтай Жақанбаевты ешқайда кетпеу туралы қолхатпен босатып жібергенін айтқан. Садықованың сөзінше, Қазақстанның құқық қорғау органдары "аталған тұлғалардың қастандыққа қатысын дәлел болмағандықтан қазақстандық прокурорлар тергеу амалдарын жүргізуден бас тартқан".

Маусым айының басында Қазақстан бас прокуратурасы Азаттыққа жолдаған жазбаша жауабында "сотқа дейінгі тергеу амалдары басталғанын, тергеу құпиялығына байланысты басқа ақпарат жарияланбайтынын" айтты.

Садықов пен әйелі Наталья Садықова Қазақстаннан кетіп, Украинадан босқын мәртебесін алған. Ерлі-зайыпты Киевте жүріп "Бәсе" YouTube-арнасын ашып, Қазақстан билігін ашық сынайтын видеолар жариялап жүрген. Қазақстан ерлі-зайыпты Наталья және Айдос Садықовтарға іздеу жариялаған еді.

Былтыр Наталья Садықова күйеуінің қазасына Қазақстан билігін айыптап, қастандық "Тоқаевтың арында" деп мәлімдеген. Астана қастандықтың артында Қазақстан билігі тұр деген айыптауды жоққа шығарған. Қазақстанның тиісті органдары аталған іс бойынша мәліметті өте сирек береді.

Азаттық ашық дереккөздерден күдіктілерге тиесілі деген нөмірлерді тауып, ол нөмірлер өзге адамдардың телефондарында "арнайы жасақ", "собр", "капитан", "снайпер" немесе "Алтай Сырбар КНБ", "Алтай КНБ" деген қосымша ақпаратпен сақталғанын анықтаған еді. ҰҚК Азаттыққа Қаратаев пен Жақанбаев ҰҚК құрамында жұмыс істемейтінін, одан басқа ақпарат бере алмайтынын мәлімдеген.

ОҚИ ОТЫРЫҢЫЗ

Наталья Садықованы аңду, Айдостың қазасы және тергеу құпиясы. "Бәсені" қудалау жалғасқаны ма?

АҚШ мемлекеттік департаменті шетелдіктерге студенттік виза беруді қайта қалпына келтіреді. Бірақ өтініш иелерінің әлеуметтік желі аккаунттары ашық болуы керек. Бұл жөнінде Associated Press агенттігі жазды.

Жабық аккаунт тексерістен жалтару немесе онлайн-белсенділікті жасыру талпынысы ретінде қарастырылмақ. Консулдардың ішкі нұсқаулықтарында олар “АҚШ-тың азаматтары, мәдениеті, үкіметі, институттары немесе негізгі принциптерін жек көру белгілері” бар кез келген жайтқа назар аударуы керек деп жазылған.

Мамыр айында Трамп әкімшілігі студенттік визаға жазылуды тоқтатып, өтініш иелерінің әлеуметтік желідегі аккаунттарын тексеруді күшейтуді бұйырған еді. Бұл университеттер мен наразылықты бақылау талпынысымен байланысты.

Әкімшілік оған дейін де әлеуметтік желіні тексеру бойынша белгілі бір талаптарды енгізген. Алайда ол көбіне Израильдің Газа секторындағы әрекетке қарсы наразылық шараларына қатысқан АҚШ-қа оралған студенттерге қатысты болған.

Бұл жаңалыққа қазақстандық кейбір шенеуніктер жылдам реакция білдірді. Мысалы, ғылым және жоғары білім министрі Саясат Нұрбек АҚШ-тан студенттік виза алғысы келетін қазақстандықтарға әлеуметтік желідегі аккаунттарын тазалауға кеңес берген.

“Барлық студенттерімізге аккаунттарды тазалап, сақ болуларыңызды ескерткім келеді. Бұл виза беретіндерге қатысты” деді бейсенбі күні Саясат Нұрбек сенат кулуарында. Оның сөзінен “Власть” үзінді келтіреді.

АҚШ-та қанша қазақстандық оқитыны жөнінде мәлімет жоқ. Бұған дейін ғылым және жоғары білім министрлігі АҚШ-тың танымал Гарвард университетінде "Болашақ" бағдарламасымен 7 қазақстандық оқып жатқанын айтқан.

18 маусымда Петербург халықаралық экономика форумында Ресей басшысы Владимир Путин мұнай экспорттауда Ресейге тәуелді Қазақстанның оны әртараптандыру талпынысы туралы да пікір білдірді.

“Экспортталатын Қазақстан мұнайының негізгі көлемі Ресей арқылы өтеді. Негізгісі. Бұл Каспий құбыр консорциумы арқылы [тасымалданады]. Басқа жолдар арқылы да тасымалданады. Қазақстаннан экспортталатын мұнайдың барлығы-дерлік Ресей арқылы өтеді. Бірақ біз Қазақстанның әртараптандыруға мүдделі екенін түсінеміз және мұны жеңілдетуге, көмектесуге дайынбыз” деді ол.

Қазақстан мұнайының басым бөлігі ресейлік Каспий құбыр консорциумы арқылы халықаралық нарыққа жол тартады.

Ресей Украинада соғыс бастағалы бері Қазақстан билігі балама жолдар, оның ішінде Баку – Тбилиси – Жейхан құбыры туралы жиі айтатын болған. Кейінгі уақытта осы бағытта тасымал көлемі артқанымен, әлі де болса Каспий құбыр консорциумы (КҚК) арқылы өтетін көлеммен салыстырғанда әлдеқайда аз. Былтыр Баку – Тбилиси – Жейхан құбыры Қазақстаннан 1,5 миллион тонна мұнай қабылдады. Сол уақытта үкімет жоспарында мұнай тасымалын жылына 20 миллион тоннаға дейін ұлғайту көзделіп отырғаны айтылғанымен, нақты мерзімі аталған жоқ.

Қазақстандық сарапшылар үкіметті Ресейге тәуелділікті азайтуға шақырып, аймақта жанжалдар күшейе қалған жағдайда ондай тәуелділіктің зор қауіп-қатер тудыратынын ескерткен.

Сәрсенбі күнгі форум кезінде Путин Қазақстанмен "одақтастық қатынас" қалыптасқанын айтып, Қазақстанды Ресейге ең жақын мемлекеттердің бірі деп атады. Ол екі ел арасындағы тауар айналымы артқанын атап өтіп, "95% ұлттық валютада жүргізілетінін" алға тартты.

Ол сонымен бірге Қазақстанда АЭС салу мәселесін де қозғап "бізде Қазақстан мен Өзбекстанның қатысуымен үшжақты жобалар көп. Атом энергетика саласында ірі жобалар пайда болуы мүмкін" деді.

Жуырда Қазақстан атом энергиясы жөніндегі агенттік елде алғашқы АЭС салу бойынша халықаралық консорциумның көшбасшысы болып ресейлік "Росатом" танылды деп мәлімдеген. Онсыз да экономикалық жағынан Ресейге тәуелді Қазақстанда бұған дейін азаматтық қоғам өкілдері мен саясаттанушылар АЭС-ті Ресей салатын болса, Қазақстан оған энергия және саяси тәуелді болып қалады деп алаңдаушылық білдірген. Кейбір энергетика сарапшылары "АЭС Қазақстанды Ресейге байлап қояды", "ол қысым құралы болуы мүмкін" деген де қауіп айтқан. Ал ресми Астана Қазақстан қоғамына АЭС-ті таңдау шешімінің саяси астары жоқ деуге сендіруге тырысып келеді.

Каспий құбыр консорциумы (КҚК) дрон соққысына байланысты Украинаға қарсы шағым түсіреді. КҚК-ның бас директоры Николай Горбан ақпан айындағы дрон соққысынан консорциуымға 2,7 млрд рубль (шамамен 34 млн доллар) көлемінде шығын келгенін мәлімдеді.

Оның сөзінше, консорциум халықаралық құқық субъектісі болмағандықтан тікелей халықаралық сотқа жүгіне алмайды. “Бірақ шағымды түсіруге мүмкіндік беретін процедура бар” деді ол 18 маусымда. Оның сөзінен "Интерфакс" үзінді келтіреді.

Ресейдің Краснодар өлкесіндегі “Кропоткинская” мұнай айдау станциясына ақпан айында дрон шабуылдаған. Нәтижесінде мұнай айдайтын жабдық бұзылған еді. Оны жөндеуге бірнеше ай кеткен. Украина шабуылды мойнына алып, "олар оккупациялық күштерге отын тасымалдауда шешуші рөл атқарды. Соққыдан кейін олар істен шықты. Бұл агрессорды отынмен қамтамасыз етуді едәуір қиындатты" деп мәлімдеген.

Қазақстан мұнайының басым бөлігі осы құбыр арқылы халықаралық нарыққа тасымалданады. Дрон шабуылдағаннан кейін консорциум Қазақстан мұнайын айдау 30 пайыз азаюы мүмкін екенін хабарлаған еді. Қазақстан сыртқы істер министрі мәселені украиналық әріптестерімен дипломатиялық арналар арқылы талқылайтынын айтқан.

КҚК акционерлерінің арасында Қазақстан да (“Қазмұнайгаз” - 19%, Kazakhstan Pipeline Ventures LLC – 1,75%) бар.

Бұған дейін қазақстандық бірқатар депутат Каспий құбыр консорциумына (КҚК) дронмен шабуыл жасағаны үшін Украинаны жауапкершілікке шақыру қажеттігін айтқан. Дегенмен депутаттардың кейбірі бұл үшін басқыншы елмен күресіп жатқан Украинаны кінәлауға болмайтынын жеткізген.

ОҚИ ОТЫРЫҢЫЗ

Каспий құбыр желісіне шабуыл. Қазақстан мұнай тасымалына төнген қауіпке кім кінәлі?

Қарағандының Бұқар жырау аудандық соты қаржы министрлігін сотқа берген белсенді Қосай Маханбаевтың өтінішін ішінара орындады. Бұл жөнінде адвокат Айнара Айдархан Азаттыққа хабарлады.

"Президент резиденциясы мен әкімдік ғимаратына шабуыл жасады" деп айыпталып, 1 жыл 8 айға сотталған Қосай Маханбаев бұған дейін сот үкімінде көрсетілген мерзімнен 2 ай 9 күн артық қамауда отырғанын айтып, министрлікті сотқа берген еді. Ол моральдық өтемақы ретінде 50 млн теңге өндіріп беруді сұраған. Ал 18 маусымда шешім шығарған сот министрлікті Маханбаевқа 2 млн теңге көлемінде өтемақы төлеуді міндеттеген.

Айнара Айдарханның сөзінше, Қарағанды соты Маханбаев пен адвокаты келтірген дәлел-дәйектерге келіскен.

"Алғашқы инстанция біздің жағымызға шығады дегенге күмәндандық. Сот бүгін (18 маусым - ред.) біз келтірген дәйектер заңды әрі даусыз екенін айтып келісті. Бірақ шағымды 2 млн теңге көлемінде жартылай қанағаттандырды. Менің ойымша, бұл тұста бәрібір Жоғарғы сотқа дейін барамыз. Қаржы министрлігі шешімді дауламақ, ал біз өтемақы көлемін арттыруды сұрайтын боламыз. Бірақ қалай болғанда да біз Бұқар жырау аудандық сотының шағым түсіруші Маханбаевтың жағына шыққанына қуаныштымыз" деді адвокат.

Бірінші сот инстанциясы Маханбаевты 1 жыл 9 айға соттаса, апелляциялық инстанция бұл мерзімді 1 жыл 8 ай қылып азайтқан еді. Адвокат бұған дейін апелляциялық соттың үкімі күшіне енсе де, Маханбаев дер кезінде босатылмағанын айтқан еді. Оның сөзінше, Қосай Маханбаевтың денсаулығы сыр бергендіктен қазір ауруханада емделіп жатыр.

Қаржы министрлігі бұл іс бойынша әзірге түсініктеме бермеді.

Қосай Маханбаев – Қаңтар оқиғасында ұсталып, Алматыдағы тергеу изоляторында азапталғандардың бірі. Оны Алматыдағы дүрбелең кезінде оқ тиіп, ауруханада жатқан жерінен полиция алып кеткен. 2022 жылы қазанда Алматы прокуратурасы Маханбаевтың азаптау ісі бойынша полиция қызметкерлері үстінен түсірген шағымын жапқаны белгілі болды.

2023 жылы Қаңтар оқиғасы бойынша айыпталған белсенді Қосай Маханбаев мәслихат депутаттығына кандидат ретінде тіркеліп, куәлік алған еді. Алайда бірнеше күннен кейін прокуратурадан арыз түсіп, Алматының сайлау комиссиясы әуелгі шешімнің күшін жойған. Аумақтық сайлау комиссиясы мұны "тергеуге қысым жасаудан сақтану" деп түсіндірген.

Былтыр маусымда Маханбаевтан өзге "президент резиденциясы мен әкімдікке шабуыл жасады" деген айыппен тағы 10 адам сотталды. Қазан айында апелляция соты үкімге өзгеріс енгізген.

ОҚИ ОТЫРЫҢЫЗ

"Тарих әркімге бағасын береді". Қаңтар ісі: үш оқ, изолятордағы азап пен ауыр айып

Қазақстанның мемлекеттік қарызы бюджет көлемінен асты. Қазақстанның мемлекеттік қарызы елдің бюджетінен 6,2 трлн теңгеге асып, 32 трлн теңге болды деп мәлімдеді мәжіліс депутаты Елнұр Бейсенбаев.

"Қазіргі кезде мемлекеттік қарыз бюджет көлемінен 6,2 триллион теңгеге асып, 32 триллион теңге болды. Тек осы қарызды өтеу үшін қазынадан жыл сайын 2 триллион теңге жұмсалады, бұл оның қысқаруына еш әсер етпейді” деді Бейсенбаев 18 маусымда 2024 жылдың республикалық бюджеттің атқарылуы туралы үкімет пен жоғары аудиторлық палатаның баяндамаларын талқылау кезінде. Оның сөзінен ҚазТАГ үзінді келтіреді.

Оның айтуынша, фискалдық қателіктер мен қарыздың көбеюі елдің бюджетіне қатер төндіріп отыр. Оның сөзінше, 2025 жылдың басындағы мәлімет бойынша, Қазақстанның сыртқы қарызы $1,5 артып, $168 млрд (86 трлн теңге) болған.

Жуырда Қазақстанның Қытайдан жиыны 6 млрд юань, яғни 425 млрд теңге (836 млн доллар) қарыз алатыны белгілі болған. Былтырғы дерек бойынша, Қазақстан Қытай алдында 4,7 триллион теңге немесе 9,2 миллиард доллар қарызы бар.

Америкалық Carnegie Endowment for International Peace қорының жазуынша, Қазақстанның Қытайға қарызы ЖІӨ-нің 3,5 пайызына тең, сол себепті Астана Пекин алдында өзін еркіндеу сезінеді. Астанаға несие беруші елдер қатарында Қытайдан бөлек Нидерланд, Ұлыбритания, АҚШ, Франция, Ресей және Бермуд аралдары бар.

ОҚИ ОТЫРЫҢЫЗ

Қазақстан Қытайдан 836 млн доллар қарыз алмақ. Бұл борыш қолайлы ма, қауіпті ме?

Ғылым және жоғары білім министрі Саясат Нұрбек қорғаныс министрлігінің талапкерлерге қатысты әрекетін заңды деп санайды. Оның сөзінше, оқуға қарағанда әскерге ертерек шақырады, сондықтан университетке түскен талапкерлерді әскерге алып кетіп жатыр.

“Назарбаев университетінің бір студентін әскери комиссариат әскерге алып кеткен. Негізі бұл жерде заң сақталған. Бірақ бізде жоғары оқу орындарына қабылдау мерзімі мен қорғаныс министрлігінің әскери шақыру мерзімі сәйкес келмейді. Назарбаев университетінде [оқуға қабылданғаны жөнінде] шешімді шілде-тамыз айларында жариялайды. Оған дейін [қорғаныс министрлігінің] студент статусына іленбегендерді алып кетуге құқылы” деді Саясат Нұрбек.

Ол қорғаныс министрлігіне мерзімді сәйкестендіру жөнінде ұсыныс бергенін айтты.

Бұған дейін елде Назарбаев университетіне түсуге оқталған бір талапкерді әскерге алып кеткен еді. Ол дайындық курсынан өтіп, жарнасын төлеп, оқу орнынан ресми түрде шақыру алған. Бірақ оны туыстарының сөзінше, ешқандай шақырусыз, ескертусіз әскерге алып кеткен.

Қазақстанда әскерге күштеп әкету жиіледі. Бұған дейін кейбір жерде әскери комиссариат азаматтарды бөлімшеге күштеп әкеткен видеолар тараған. Тіпті оқуда жүрген, әскери борышы заңды жолмен кейінге шегерілгендер де сол ұсталғандардың қатарынан табылған. Бұған дейін заңгер Жандос Мақсатұлы Азаттыққа берген сұхбатында "көшеден ұстап, сүйреп алып кету, көлікке күштеп салу - мұның бәрі заңсыз" екенін айтқан.

Цифрлық даму, инновация және аэроғарыш өнеркәсібі министрі Жаслан Мәдиев 16,3 млн қазақстандықтың жеке дерегі қолды болғаны туралы ақпаратқа түсініктеме берді. Оның түсіндіруінше, деректер "бұрын" қолды болған, ал желіге қазір жарияланып отыр.

"Бұл 2024 жылдың 1 мамыр күнгі деректер. Жаңасы болған жоқ. Уақыт өткен сайын олар жүйеге, даркнетке жарияланып жатқанын көріп отырсыздар. Бір жерде аты-жөндер, бір жерде жеке сәйкестендіру нөмірі, бір жерде телефондар. Бірақ олар ашық жарияланған кезде оларды бірден жабамыз" деді Мәдиев. Оның сөзінен "Власть" үзінді келтіреді.

Министрдің сөзінше, мемлекеттік дерекқор бұзылмаған. Бұл бұрын қолды болып кеткен деректерге ұқсайды.

16 маусым күні интернет технология, киберқауіпсіздік саласы туралы жазатын securixy_kz telegram-арнасында әлеуметтік желіде 16,3 млн жолға сиятын адамның аты-жөні, туған жылы, жеке сәйкестендіру нөмірі, тұрғылықты жері, ұлты, жынысы, азаматтығы, жұмыс орны, телефон нөміріне дейін көрсетілген жеке деректер тарап кеткенін хабарлаған.

"Мекен-жай" деген бағанда стоматология, емхана, салық комитеті, университеттер мен өзге де ұйымдардың жиі кездесетініне қарағанда, бұл деректер көпшілікке ашық я жартылай ашық API-ден, желідегі жеке деректер қоры сақталған сервистерге бұзып кіріп, жаппай алынған болуы мүмкін" деп топшылаған securixy_kz telegram-арнасы.

Ізінше цифрлық даму, инновация және аэроғарыш өнеркәсібі министрлігі миллиондаған адамның жеке деректері тарағаны жайлы ақпаратты тексеріп жатқанын хабарлаған.

Кибершабуылдарды талдау және зерттеу орталығы (ЦАРКА) өкілдері бұл бұрын әр жерлерден ұрланып, бір жерге топтастырылған деректерге ұқсайды деп мәлімдеген.

Осыдан бір апта бұрын Қазақстан ішкі істер министрлігінің киберқылмысқа қарсы іс-қимыл департаменті Ұлттық қауіпсіздік комитетімен бірлесіп жүргізілген операция нәтижесінде елде азаматтардың жеке мәліметтерін интернетте заңсыз сатып, таратумен айналысқан деген күдікпен 140-тан астам адам ұсталғанын хабарлаған. Полицияның мәлімдеуінше, тергеу барысында күдікті топ мемлекеттік базалардан азаматтардың жеке деректерін заңсыз алғаны және Telegram платформасы арқылы таратқаны анықталған.

Оппозициялық блогер, журналист, "Бәсе" YouTube-арнасының авторы Айдос Садықовтың қазасына бір жыл болды.

Журналистің қазасынан бері бір жыл өтсе де, күдіктілер ұсталмаған, Қазақстан билігі Садықовтың өліміне қатысты іс бойынша сұрақтарға біртекті жауап берумен келеді. Маусым айының басында Қазақстан бас прокуратурасы Азаттыққа жолдаған жазбаша жауабында "сотқа дейінгі тергеу амалдары басталғанын, тергеу құпиялығына байланысты басқа ақпарат жарияланбайтынын" айтты.

18 маусымда "Бәсе" арнасы Садықовтың қазасына қатысы болуы мүмкін тағы бір "адамның аты-жөнін жариялап, ол журналистің отбасын Прагада аңдығанын" хабарлады. Арна жариялаған видеода оның суреті мен аты-жөні толық көрсетілген.

Қазақстанның құзырлы органдары әзірге бұл ақпаратқа түсініктеме бермеді.

Былтыр 18 маусымда бір миллионнан астам жазылушысы бар оппозициялық "Бәсе" YouTube-арнасының авторы Айдос Садықовты Киевтегі үйінің маңында атып кеткен. Басына оқ тиіп, ауыр жараланған белсенді 2 шілдеде ауруханада көз жұмды.

Сол кезде Украина бас прокуратурасы Садықовтың қазасына қазақстандық Алтай Жақанбаев пен Мейрам Қаратаевты күдікті ретінде атаған. Кейін Қазақстан билігі Жақанбаев елге оралып, өз еркімен берілді деп хабарлаған.

Биыл көктемде марқұм Айдос Садықовтың жесірі Наталья Садықова "Республика" басылымына Украинаның құқық қорғау органдарының мәліметіне сүйене отырып, Қазақстан Алтай Жақанбаевты ешқайда кетпеу туралы қолхатпен босатып жібергенін айтқан. Садықованың сөзінше, Қазақстанның құқық қорғау органдары "аталған тұлғалардың қастандыққа қатысын дәлел болмағандықтан қазақстандық прокурорлар тергеу амалдарын жүргізуден бас тартқан".

Украиналық адвокат Дмитрий Моргун мамыр айында "Бәсе" арнасына берген сұхбатында Украина жағы Қазақстанға бір жыл ішінде үш рет сұрау салғанын, Қазақстанның құзырлы органдары тиісті дәрежеде қимылдамай отырғанын айтқан. Үш сұраудың негізгісі былтыр желтоқсанда берілген.

"Нақты жағдайда [Қазақстан] прокуратурасы Жақанбаев ешқайда кетпеу туралы қолхатпен жүр деді. Мұндай қолхат айталық, әдетте велосипед ұрлаған адамға қатысты немесе дүкенде шұжық ұрлаған адамға қолданылады. Барлық дәлел болып отырған кезде, халықаралық сұрауға сұрақтардың тізімін тіркеп жіберген кезде...Украина прокуратурасы [Қазақстан жағына] бірқатар дәлелді берген. Бұл аздай, бұл резонанс тудырған іс. Айдос босқындар құқығы қорғау туралы конвенциямен қорғалған адам болған. Ол халықаралық деңгейде бекітілген. Бұл ЕҚЫҰ-дан басталып БҰҰ-мен аяқталған халықаралық институциялар бақылап, зерттеп отырған іс. Бұдайша сұрауды елемей, орындамау, тұтас жүйені бұзу. Қазақстан сұрауды орындамаса, Украина да Қазақстанның сұрауларын орындауға міндетті емес болады..." деді адвокат сұхбатта.

Бұған дейін Қазақстан билігі қастандықты орындады деп күдікке ілінгендерді Украинаға беруден бас тартқаны хабарланған еді. Астана күдікті Қазақстан азаматы екенін алға тартқан.

Журналист, белсенді Айдос Садықов пен әйелі Наталья Садықова Қазақстаннан кетіп, Украинадан босқын мәртебесін алған. Ерлі-зайыпты Киевте жүріп "Бәсе" YouTube-арнасын ашып, Қазақстан билігін ашық сынайтын видеолар жариялап жүрген. Қазақстан ерлі-зайыпты Наталья және Айдос Садықовтарға іздеу жариялаған еді.

Былтыр Наталья Садықова күйеуінің қазасына Қазақстан билігін айыптап, қастандық "Тоқаевтың арында" деп мәлімдеген. Астана қастандықтың артында Қазақстан билігі тұр деген айыптауды жоққа шығарған. Қазақстанның тиісті органдары аталған іс бойынша мәліметті өте сирек береді.

Азаттық ашық дереккөздерден күдіктілерге тиесілі деген нөмірлерді тауып, ол нөмірлер өзге адамдардың телефондарында "арнайы жасақ", "собр", "капитан", "снайпер" немесе "Алтай Сырбар КНБ", "Алтай КНБ" деген қосымша ақпаратпен сақталғанын анықтаған еді. ҰҚК Азаттыққа Қаратаев пен Жақанбаев ҰҚК құрамында жұмыс істемейтінін, одан басқа ақпарат бере алмайтынын мәлімдеген.

Солтүстік Корея билігі Ресейдің Курск облысын қалпына келтіруге бірнеше мың әскери қызметкерін жібереді. Пхеньянда Ким Чен Ынмен келіссөз кезінде Ресей аумағын минадан тазартуға 1000 сапер және «қираған инфрақұрылым нысандарын қалпына келтіру үшін» 5 мың әскери құрылысшы жіберу туралы келісімге қол жеткізілді, деп хабарлады сейсенбі күні Ресей Қауіпсіздік кеңесінің хатшысы Сергей Шойгу.

Осы апада Шойгу Солтүстік Кореяға тағы барған. Шойгу кейінгі үш айда Солтүстік Кореяға осымен үшінші рет сапармен барып отыр. Сапар екі ел арасындағы жан-жақты серіктестік туралы келісімге қол қойылған күннің бір жылдығына орайластырылғанын "Рёнхап" агенттігі жазған. Агенттік Ким Чен Ынның Ресейге жасайтын сапарына дайындық жүріп жатуы мүмкін екенін жазды, бірақ ол сапар ресми түрде жарияланған жоқ.

Курск облысының губернаторы Александр Хинштейн маусым басында аймақта шамамен 5 мың гектар жер миналанғанын айтқан. Бұл – облыс жерінің алтыдан бір бөлігі. Оның сөзінше, 8% минадан тазартылған.

Сейсенбі күні "Ресей поштасы" Солтүстік Кореяға сәлемдеме-хаттарды жіберуді қалпына келтірілгені хабарланды. Бұған қоса, 17 маусымнан бастап Мәскеу мен Пхеньян арасында темір жол қатынасы қалпына келтірілген.

Ресей Украинаға басып кіргелі бері Мәскеу мен Пхеньян арасындағы ынтымақтастық күшейді. Пхеньян Ресейдің Украинаға басқыншылығын қолдап отыр. Солтүстік Корея Ресейге артиллерия снарядтарын, зымырандар, минометтер мен артиллерия жүйелерін берген. Ресей бұл қару-жарақтарды Украинаға қарсы соғыста пайдаланады. Сонымен қатар, Солтүстік Кореяның бірнеше мың сарбазы Ресей жағында соғыс қимылдарына қатысқаны белгілі.

Қазақстанда екінші АЭС-тің құрылысына қатысты шешім осы күзде қабылдануы мүмкін. Бұл туралы "Орталық Азия – Қытай" форумының кулуарында премьер-министрдің орынбасары Роман Скляр айтты.

"Шешім күзде қабылданады деп ойлаймын. Көп созбаймыз. Күзге таман қандай да бір цифрлар, деректер болады. Одан да бұрын беруіміз мүмкін" деді Скляр.

Премьердің орынбасары екінші АЭС салынатын жер де күзде анықталуы мүмкін екенін айтады. Бірақ құрылыстың құны мен АЭС-тің салынып біту уақыты кейін белгілі болмақ.

Қазақстанда бірінші АЭС құрылысын салатын консорциумды Ресейдің "Росатом" компаниясы, екінші АЭС салу бойынша консорциумды Қытайдың China National Nuclear Corporation (CNNC) компанияына басқарады.

Қазақстанда АЭС салуға "Росатом" мен CNNC компаниясынан бөлек "Électricité de France" (Франция) және "Korea Hydro & Nuclear Power" (Оңтүстік Корея) қызығушылық танытқан. Ал Астананың таңдауы елге экономикалық ықпалы көп Ресей мен Қытайға түсті.

Елде бұған дейін азаматтық қоғам мен саясаттанушылар АЭС-ті Ресей салатын болса, Қазақстан оған энергия және саяси тәуелді болып қалады деп алаңдаушылық білдірген. Мәселен, энергетика сарапшысы Әсет Наурызбаев "АЭС Қазақстанды Ресейге байлап қояды", "ол қысым құралы болуы мүмкін" деген қауіп айтқан.

Кей сарапшылар Украинаға басқыншылығына байланысты санкцияларға ілініп, оқшауланған Ресейдің ядролық энергия саласын қолдау жүгі әдеттегідей Кремльмен тығыз байланысты Орталық Азия елдерінің иығына түсіп отыр деп санайды. Ресей Қазақстаннан бөлек, Өзбекстан мен Қырғызстанға да атом электр станциясын салуды жоспарлап отыр.

ОҚИ ОТЫРЫҢЫЗ

Қазақстанға алғашқы атом электр станциясын Ресей салып бермек